ଥୁଆମୂଳ ରାମପୁର, ୨୬/୦୭ ( ବିଷ୍ଣୁ ଚରଣ ସ୍ୱାଇଁ ) : ପେଟର ଭୋକ ଓ ପରିବାର ପ୍ରତିପୋଷଣ ପାଇଁ କେରଳକୁ ଦାଦନ ଖଟିବାକୁ ଯାଇଥିବା ଜଣେ ନିରୀହ ଯୁବକ ନିଖୋଜ ହେବାର ବର୍ଷେ ବିତିବାକୁ ବସିଥିଲେ ବି ତାଙ୍କର କୌଣସି ପତ୍ତା ମିଳୁନାହିଁ। କଳାହାଣ୍ଡି ଜିଲ୍ଲା ଥୁଆମୂଳ ରାମପୁର ଥାନା ଅନ୍ତର୍ଗତ ରାଣିଦୁମେର ଗ୍ରାମର ରଥ ଗୌଡ଼ (୨୨) ନିଖୋଜ ହେବା ଘଟଣାରେ ନେତା ଠାରୁ ଆରମ୍ଭ କରି ଏସପି ଓ କଲେକ୍ଟରଙ୍କ ଦ୍ୱାରସ୍ଥ ହୋଇ ନୟାନ୍ତ ହେବା ପରେ, ଗତ ଶନିବାର ପରିବାର ଲୋକେ ପୁନର୍ବାର ନ୍ୟାୟ ଆଶାରେ ଥୁଆମୂଳ ରାମପୁର ଥାନାର ଦ୍ୱାରସ୍ଥ ହୋଇଛନ୍ତି। ସୂଚନାଯୋଗ୍ୟ, ଗତ ବର୍ଷ ଅକ୍ଟୋବର ୭ରେ ରଥ କେରଳର ଆଲୁଭା ରେଳ ଷ୍ଟେସନରୁ ଘରକୁ ଫେରିବା ସମୟରେ ସ୍ତ୍ରୀ ଲଳିତାଙ୍କ ସହ କଥା ହୋଇଥିଲେ। କିନ୍ତୁ ଏହାର କିଛି ସମୟ ପରେ ତାଙ୍କ ଫୋନ୍ ବନ୍ଦ ହୋଇଯାଇଥିଲା। ପରେ ଦିଲୀପ ଦୁଆରା ନାମକ ଜଣେ ବ୍ୟକ୍ତି ରଥଙ୍କ ଫୋନରୁ କଲ୍ କରି ପ୍ରଥମେ ୫ ହଜାର ଓ ପରେ ୫୦ ହଜାର ଟଙ୍କା ଫିରୋତି ମାଗିବା ସହ, ଟଙ୍କା ନଦେଲେ ରଥଙ୍କୁ ହତ୍ୟା କରି ଅଙ୍ଗପ୍ରତ୍ୟଙ୍ଗ ବିକ୍ରି କରିଦେବାକୁ ଧମକ ଦେଇଥିଲା। ଏହି ଘଟଣାରେ ପରିବାର ଲୋକେ ଅକ୍ଟୋବର ୧୦ରେ ଥୁଆମୂଳ ରାମପୁର ଥାନାରେ ଲିଖିତ ଅଭିଯୋଗ (ମିସିଂ କେସ୍ ନଂ: ୧୯/୨୫, ଜି.ଡି ନଂ-୦୫) କରିବା ସହ ଅକ୍ଟୋବର ୧୭ରେ ଜିଲ୍ଲା ଆରକ୍ଷୀ ଅଧୀକ୍ଷକ, ନଭେମ୍ବର ୩ରେ ଜିଲ୍ଲାପାଳଙ୍କ ଜନଶୁଣାଣି ଏବଂ କେରଳ ପୋଲିସ ନିକଟରେ ଗୁହାରି କରିଥିଲେ। ସୁଫଳ ନମିଳିବାରୁ ଗତ ଶନିବାର ରଥଙ୍କ ବୃଦ୍ଧ ବାପା କାଳିଆମଣି, ମାଆ ନେପୁରା, ସ୍ତ୍ରୀ ଲଳିତା ଓ ୧୧ ମାସର ଶିଶୁ ପୁତ୍ରକୁ ଧରି ପରିବାର ଲୋକେ ପୁନଃ ଥାନାର ଦ୍ୱାରସ୍ଥ ହୋଇଥିଲେ। ଏହି ସମୟରେ ଏକ ଯୁବ ସାମ୍ବାଦିକ ପ୍ରତିନିଧି ଦଳ ମଧ୍ୟ ଥାନାରେ ପହଞ୍ଚି ତୁରନ୍ତ ନିଖୋଜ ଶ୍ରମିକଙ୍କୁ ଖୋଜି ବାହାର କରିବାକୁ ପୋଲିସକୁ ନିବେଦନ କରିଛନ୍ତି। "ଆମ ଲୋକ ଜୀବିତ ଅଛନ୍ତି ନା ମୃତ, ସରକାର ସେତିକି ସ୍ପଷ୍ଟ କରିଦିଅନ୍ତୁ" ବୋଲି କାନ୍ଦି କାନ୍ଦି ଗୁହାରି କରିଛନ୍ତି ଅସହାୟ ପରିବାର। ଏନେଇ ଥୁଆମୂଳ ରାମପୁର ଥାନା ଅଧିକାରୀ କୈବଲ୍ୟ ସେଠ୍ଙ୍କୁ ପଚାରିବାରୁ ସେ କହିଛନ୍ତି ଯେ, ମିସିଂ ଏଫ୍ଆଇଆର୍ ରୁଜୁ ହୋଇଛି ଏବଂ ସନ୍ଦେହଜନକ ଫୋନ୍ ନମ୍ବର ସହ ଫିରୋତି କଲ୍ ଆସିଥିବା ନମ୍ବରଗୁଡ଼ିକୁ ଟ୍ରାକିଂ କରାଯାଉଛି। ଆଜିର ଆଧୁନିକ ଟେକ୍ନୋଲୋଜି ଯୁଗରେ ବର୍ଷେ ବିତିବାକୁ ବସିଥିଲେ ବି ଜଣେ ନିଖୋଜ ଶ୍ରମିକଙ୍କୁ ଖୋଜି ନପାରିବା ଓଡ଼ିଶା ପୋଲିସର କାର୍ଯ୍ୟଦକ୍ଷତା ଓ ଦାଦନ ନିୟନ୍ତ୍ରଣ ବ୍ୟବସ୍ଥା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ତୁରନ୍ତ ନିଖୋଜ ରଥ ଗୌଡ଼ଙ୍କୁ ଉଦ୍ଧାର କରିବାକୁ ଅଞ୍ଚଳବାସୀ ଦାବି କରିଛନ୍ତି।
କଳାହାଣ୍ଡି ଜିଲ୍ଲା ପ୍ରତିନିଧି ବିଷ୍ଣୁ ଚରଣ ସ୍ୱାଇଁ ଙ୍କ ରିପୋର୍ଟ
