"ଦୁର୍ଗମ ଅଞ୍ଚଳର ଗଛ ତଳେ ବସି 'ମନ କି ବାତ' ଦେଖୁଛନ୍ତି ମହିଳା — ଡିଜିଟାଲ ଭାରତର ଏକ ଜୀବନ୍ତ ଦୃଶ୍ୟ"

ଝରିଗାଁ, ୨୯ / ୬ ( ନକୁଳ ଭତ୍ରା ) : ନବରଙ୍ଗପୁର ଜିଲ୍ଲା ଝରିଗାଁ ବ୍ଳକର ଧାମନାଗୁଡା ପଞ୍ଚାୟତ ଅଧିନରେ ଥିବା ଦୁର୍ଗମ ଅଞ୍ଚଳ ମଙ୍ଗରା ଛଚରା ଟୁଟି ଗୁଡ଼ା ଗାଁ ରେ ଏକ ଅପୂର୍ବ ଦୃଶ୍ୟକୁ ଦେଖିବାକୁ ମିଳିଲା । ଏଠାରେ ସ୍ଥାନୀୟ ମହିଳାମାନେ ଏକ ଗଛପାଖରେ ବସି ମୋବାଇଲ ମାଧ୍ୟମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ‘ମନ କି ବାତ’ କାର୍ଯ୍ୟକ୍ରମ ଦେଖୁଥିବା ଦୃଶ୍ୟ ସ୍ପଷ୍ଟ କରିଦେଇଛି ଯେ ଡିଜିଟାଲ ଭାରତ ଏବେ ଦୁର୍ଗମ ପାହାଡିଆ ଅଞ୍ଚଳକୁ ମଧ୍ୟ ଛୁଇଁପାରିଛି। ଏଠାରେ ଥିବା ମହିଳାମାନେ — ନିରାସା ଭତ୍ରା, ଆୟତି, ସବର୍ଣ୍ଣ, ସନାଦି, ଜୟତି, କନକ, ମାଝୀ, ଦୟମତି, ମତି, ପଦ୍ମନି, ପୁନାୟ ଓ ଅନ୍ୟମାନେ ଏହି କାର୍ଯ୍ୟକ୍ରମକୁ ଆଗ୍ରହର ସହିତ ଦେଖୁଥିଲେ। ମୋଦି ସରକାରଙ୍କ ଯୋଜନା ଓ ସୂଚନା ଏବେ ଏମିତି ଅଞ୍ଚଳରେ ମଧ୍ୟ ସମୟରେ ପହଞ୍ଚୁଛି — ଯେଉଁଠାରେ ଗତକାଲି ପର୍ଯ୍ୟନ୍ତ ମୌଳିକ ସୁବିଧା ମଧ୍ୟ ଆସିପାରୁନଥିଲା। ଏଥିରେ ଦେଖାଯାଉଛି ଯେ ଏହି ଗାଁର ଜନସାଧାରଣ ମଧ୍ୟ ଡିଜିଟାଲ ଶିକ୍ଷା ଓ ସୂଚନା ର ଗୁରୁତ୍ୱ ବୁଝିପାରିଛନ୍ତି। ସେମାନେ କହିଛନ୍ତି — "ମୋଦି ସରକାର ଙ୍କର ସମସ୍ତ ସେବା ଏବେ ଆମ ନିକଟକୁ ପହଞ୍ଚୁଛି, ଆମେ ମୋବାଇଲରେ ଖବର, ଯୋଜନା ଓ ମନ କି ବାତ ଯଥାସମୟରେ ଦେଖୁପାରୁଛୁ।" ଏହି ଦୃଶ୍ୟ ଏକ ମାନବିକ ଓ ବିକାଶମୂଳକ ଚିତ୍ର ଅଙ୍କନ କରେ — ଯେଉଁଠି ଦେଶର ସର୍ବଶେଷ ଅଞ୍ଚଳ ମଧ୍ୟ ଏବେ ରାଷ୍ଟ୍ରୀୟ ସଂଲାପ ଓ ନୀତି ର ଅଂଶୀଦାର ହେଉଛନ୍ତି। ଏହି ଡିଜିଟାଲ ଉନ୍ନତି ଏବଂ ସଚେତନତା ଅଭିଯାନ ପ୍ରତି ସରକାରଙ୍କ ଦୃଢ଼ ପଦକ୍ଷେପର ଏକ ସଫଳ ପରିଣାମ ଭାବେ ଦେଖାଯାଉଛି।