ଓଡିଶାକୁ ଷ୍ଟିଲ ଶକ୍ତିର ଅଗ୍ରଗାମୀ ରାଜ୍ୟ ବନାଇବା ପାଇଁ ତିଆରି ହେଲା ଯୋଜନା

ଭୁବନେଶ୍ୱର, ୧୫ / ୫ :  – ଦେଶର ଇଷ୍ପାତ ଉତ୍ପାଦନ କ୍ଷେତ୍ରକୁ ନୂଆ ଗତି ଦେବା ଲକ୍ଷ୍ୟରେ ଭୁବନେଶ୍ୱରରେ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଛି। ଇଣ୍ଡିଆନ୍ ଷ୍ଟିଲ ଆସୋସିଏସନ୍ (ISA) ଅଧ୍ୟକ୍ଷ ନବୀନ ଜିନ୍ଦଲଙ୍କ ନେତୃତ୍ୱରେ ଷ୍ଟିଲ କ୍ଷେତ୍ରର ଅନେକ ଅଗ୍ରଣୀ ପ୍ରତିନିଧି ଗୁରୁବାର ଦିନ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଭେଟି ରାଜ୍ୟର ଷ୍ଟିଲ ଉତ୍ପାଦନ ସମ୍ଭାବନା ଓ ନିବେଶ ସୁବିଧା ବୃଦ୍ଧି ଉପରେ ଚର୍ଚ୍ଚା କରିଛନ୍ତି।
ମୁଖ୍ୟମନ୍ତ୍ରୀ ଏହି ସମୟରେ ଘୋଷଣା କରିଛନ୍ତି ଯେ, ୨୦୩୬ ସୁଦ୍ଧା “ସମୃଦ୍ଧ ଓଡିଶା” ଓ ୨୦୪୭ ସୁଦ୍ଧା “ବିକଶିତ ଭାରତ” ଗଠନରେ ଓଡିଶା ଏକ ମୁଖ୍ୟ ଭୂମିକା ନିବାହ କରିବ। ଏଥିପାଇଁ ଖଣି ଓ ଇଷ୍ପାତ କ୍ଷେତ୍ରର ସମୃଦ୍ଧିକୁ ଆବଶ୍ୟକ ବୋଲି ସେ ଉଲ୍ଲେଖ କରିଛନ୍ତି।
ବୈଠକରେ ଜଣାପଡ଼ିଛି ଯେ ବର୍ତ୍ତମାନ ଭାରତର ଷ୍ଟିଲ ଉତ୍ପାଦନ ବାର୍ଷିକ ୧୬୫ ମିଲିଅନ୍ ଟନ ରହିଛି। ୨୦୪୭ ସୁଦ୍ଧା ଏହାକୁ ୫୦୦ ମିଲିଅନ୍ ଟନରେ ପହଞ୍ଚାଇବା ଲକ୍ଷ୍ୟ ରଖାଯାଇଛି। ଏହି ଉଦ୍ୟମରେ ଓଡିଶା ଏକ  ପଥ ଦେଖାଉଥିବା ରାଜ୍ୟ ଭାବେ ଉଭୟ ଲୁହାପଥର ଉପଲବ୍ଧତା ଓ ନିବେଶ ପାଇଁ ସୁବିଧା ପ୍ରଦାନରେ ଅଗ୍ରଗାମୀ ହେବା ଅପେକ୍ଷା ରହିଛି।
ବୈଠକରେ ଆଗାମୀ ଦିନରେ ଅଧିକ ଲୁହାପଥର ଖଣି ନିଲାମ୍, ନିଲାମ୍ ହୋଇଥିବା ଖଣିରୁ ଶୀଘ୍ର ଉତ୍ତୋଳନ ଆରମ୍ଭ ଓ OMC ମାଧ୍ୟମରେ ଉଦ୍ୟୋଗମାନେ ସୁବିଧାରେ କିପରି ଆବଶ୍ୟକ ଧାତୁ ମାନ୍ୟ ପାଇପାରିବେ — ସେବିଷୟରେ ଗୁରୁତ୍ୱାରୋପ କରାଯାଇଛି। ଚଳିତବର୍ଷ ପ୍ରାୟ ୩୦ ଟି ଖଣି ନିଲାମ୍ ହେବାର ସମ୍ଭାବନା ଥିବା ମଧ୍ୟ ଜଣାପଡ଼ିଛି।
ଏହି ବୈଠକ ମାଧ୍ୟମରେ ରାଜ୍ୟ ସରକାର ଏହି ବୃହତ ଦୃଷ୍ଟିକୋଣ ସହିତ ଷ୍ଟିଲ କ୍ଷେତ୍ରକୁ ଏକ ଅନ୍ତର୍ଜାତୀୟ ମାନ ସହିତ ଗଠନ କରିବାକୁ ଚେଷ୍ଟା କରୁଛି, ଯାହା ଓଡିଶାକୁ ଭବିଷ୍ୟତର ଉଦ୍ୟୋଗ ଓ ଓଦ୍ୟୋଗିକ ରାଜ୍ୟ ଭାବେ ପରିଚୟ ଦେଇପାରିବ।