୧୦ ଦଫା ଦାବି ନେଇ ଡାକ୍ତରଙ୍କ ଧାରଣା

ରାୟଗଡ଼ା, ୦୫/୦୭ ( ଭି. ଗୌରି ଶଙ୍କର ରାଓ ) : ବିଭିନ୍ନ ସମସ୍ୟାର ସମାଧାନ ଓ ୧୦ ଦଫା ଦାବି ପୂରଣ ଦାବିରେ ରାୟଗଡ଼ା ଜିଲ୍ଲାର ଡାକ୍ତରମାନେ ଜିଲ୍ଲା ମୁଖ୍ୟ ଚିକିତ୍ସାଳୟ ପରିସରରେ ଧାରଣାରେ ବସିଥିଲେ। ଏହି ଧାରଣାରେ ଜିଲ୍ଲାର ବହୁ ସରକାରୀ ଡାକ୍ତର ଯୋଗଦେଇ ସରକାରଙ୍କ ଦୃଷ୍ଟି ଆକର୍ଷଣ କରିଥିଲେ। ଡାକ୍ତରମାନଙ୍କ କହିବାନୁସାରେ, ଦୀର୍ଘଦିନ ଧରି ସେମାନଙ୍କ ବିଭିନ୍ନ ନ୍ୟାୟସଙ୍ଗତ ଦାବି ଅପୂରଣୀୟ ରହିଛି। ସେବା ସର୍ତ୍ତରେ ସୁଧାର, ପଦୋନ୍ନତି, ଖାଲି ପଦବୀ ପୂରଣ, ସୁରକ୍ଷିତ କାର୍ଯ୍ୟ ପରିବେଶ, ଆବଶ୍ୟକ ଭିତ୍ତିଭୂମି ଓ ଅନ୍ୟାନ୍ୟ ସୁବିଧା ସହ ୧୦ ଦଫା ଦାବିକୁ ଶୀଘ୍ର କାର୍ଯ୍ୟକାରୀ କରିବା ପାଇଁ ସେମାନେ ସରକାରଙ୍କୁ ଅନୁରୋଧ କରିଛନ୍ତି। ଧାରଣା ସମୟରେ ଡାକ୍ତରମାନେ କହିଥିଲେ ଯେ, ସରକାର ଯଦି ଦାବିଗୁଡ଼ିକ ପ୍ରତି ସକାରାତ୍ମକ ପଦକ୍ଷେପ ଗ୍ରହଣ ନକରନ୍ତି, ତେବେ ଆଗାମୀ ଦିନରେ ଆନ୍ଦୋଳନକୁ ଅଧିକ ଜୋରଦାର କରାଯିବ। ତେବେ ଜରୁରୀକାଳୀନ ସ୍ୱାସ୍ଥ୍ୟ ସେବାକୁ ବାଧା ନ ପହଞ୍ଚାଇ ଶାନ୍ତିପୂର୍ଣ୍ଣ ଭାବେ ଧାରଣା କାର୍ଯ୍ୟକ୍ରମ ଚାଲିଥିବା ସୂଚନା ମିଳିଛି। ଏହି ଧାରଣାକୁ ନେଇ ଜିଲ୍ଲାର ସ୍ୱାସ୍ଥ୍ୟ ମହଲରେ ଚର୍ଚ୍ଚା ଜୋର ଧରିଥିବା ବେଳେ, ଡାକ୍ତରମାନଙ୍କ ଦାବି ପ୍ରତି ସରକାର କେତେ ଶୀଘ୍ର ପଦକ୍ଷେପ ନେଉଛନ୍ତି ତାହା ଉପରେ ସମସ୍ତଙ୍କ ନଜର ରହିଛି।