ଓଡ଼ିଶାରେ ନୂଆ ୩ କୋଭିଡ୍ ଆକ୍ରାନ୍ତ, ଜଣେ ବୃଦ୍ଧଙ୍କ ମୃତ୍ୟୁ

ଭୁବନେଶ୍ୱର, ୧ / ୬ : ରାଜ୍ୟରେ ଦୀର୍ଘ ଅବଧି ପରେ କୋଭିଡ୍ ଆକ୍ରମଣ ପୁଣି ଚିନ୍ତା ଜନକ ରୂପ ନେଉଛି। ରବିବାର ଦିନ ରାଜ୍ୟରେ ନୂଆ ୩ ଜଣ କୋଭିଡ୍ ପଜିଟିଭ୍‌ ଚିହ୍ନଟ ହୋଇଛନ୍ତି ବୋଲି ସ୍ୱାସ୍ଥ୍ୟ ବିଭାଗ ଦ୍ୱାରା ଜଣାପଡ଼ିଛି। ଏହା ସହିତ ରାଜ୍ୟରେ ବର୍ତ୍ତମାନ ମୋଟ ଆକ୍ରାନ୍ତଙ୍କ ସଂଖ୍ୟା ୧୧ ଜଣକୁ ପହଞ୍ଚିଛି। ସେପଟେ ରାଜଧାନୀ ଭୁବନେଶ୍ୱରରେ ଜଣେ ବୃଦ୍ଧ ରୋଗୀଙ୍କ ମୃତ୍ୟୁ ଘଟିଛି, ଯେଉଁଠାରେ ସେ କିଛି ଦିନ ପୂର୍ବରୁ କୋଭିଡ୍ ପଜିଟିଭ୍‌ ଚିହ୍ନଟ ହୋଇଥିଲେ। ସ୍ୱାସ୍ଥ୍ୟ ବିଭାଗ ଅନୁସାରେ, ସେ ବୃଦ୍ଧ ଅନ୍ୟାନ୍ୟ ଗୁରୁତର ରୋଗରେ ମଧ୍ୟ ପୀଡିତ ଥିଲେ। ପ୍ରଥମେ ଘରୋଇ ହସ୍ପିଟାଲରେ ଚିକିତ୍ସା ପରେ ସେ ଘରକୁ ଫେରି ହୋମ୍‌ ଆଇସୋଲେସନ୍‌ରେ ରହିଥିଲେ। ଶନିବାର ରାତିରେ ତାଙ୍କର ମୃତ୍ୟୁ ଘଟିଥିବା ନେଇ ସୂଚନା ମିଳିଛି, ଏବଂ ଏହାକୁ ଚଲିତ ବର୍ଷରେ ଓଡ଼ିଶାର ପ୍ରଥମ କୋଭିଡ୍ ମୃତ୍ୟୁ ବୋଲି ଗଣାଯାଉଛି। ଯଦିଓ ଏହି ମୃତ୍ୟୁ କୋଭିଡ୍ ଦ୍ୱାରା କି ଅନ୍ୟ କାରଣରୁ ଘଟିଛି, ସେନେଇ ସ୍ୱାସ୍ଥ୍ୟ ବିଭାଗ ପକ୍ଷରୁ ସ୍ପଷ୍ଟ ସୂଚନା ମିଳିନାହିଁ।ଏହାପୂର୍ବରୁ ରାଜ୍ୟରେ ୫ ଟି ମାମଲା ଚିହ୍ନଟ ହୋଇଥିବା ବେଳେ, ଶନିବାର ଆଉ ୨ ଜଣଙ୍କୁ ନେଇ ସୂଚନା ଦିଆଯାଇଥିଲା। ରବିବାର ନୂଆ ୩ ଆକ୍ରାନ୍ତ ସହ ଏହି ସଂଖ୍ୟା ୧୧ କୁ ବୃଦ୍ଧି ପାଇଛି। ସ୍ୱାସ୍ଥ୍ୟ ବିଭାଗ ଏଥିପାଇଁ ସଚେତନତା ବଢ଼ାଇବା ଉପରେ ଜୋର୍‌ ଦେଉଛି, ଏବଂ ଲୋକଙ୍କୁ ଆବଶ୍ୟକ ସାବଧାନି ଅବଲମ୍ବନ କରିବା ପାଇଁ ଅନୁରୋଧ କରାଯାଇଛି।