ତୀରମାଡରେ ଗୁରୁତର ଆହତ ବିଧବା ମହିଳା, ଅଭିଯୁକ୍ତ ଅଟକ

ବଣାଇଁ, ୧ / ୬ : ସୁନ୍ଦରଗଡ଼ ଜିଲ୍ଲାର ଲହୁଣୀପଡ଼ା ଥାନା ଅଧୀନ ଗମଲେଇ ଗାଁରେ ଗତ ରବିବାର ଭୋର ସମୟରେ ଏକ ଅଭାବନୀୟ  ଘଟଣା ଘଟିଛି। ଏଥିରେ ଗ୍ରାମର ବିଧବା ମହିଳା ଲକ୍ଷ୍ମୀ କିଷାନ ତୀରମାଡରେ ଗୁରୁତର ଆହତ ହୋଇଥିବା ବେଳେ ତୀର ଛାଡ଼ିଥିବା ବ୍ୟକ୍ତି ଲୁକୁ କିଷାନକୁ ପୋଲିସ ଅଟକ କରିଛି। ସୂତ୍ର ଅନୁଯାୟୀ, ଲକ୍ଷ୍ମୀ ଓ ତାଙ୍କ ସମ୍ପର୍କୀୟ ଲୁକୁ ମଧ୍ୟରେ ପୂର୍ବରୁ ଭଲ ସମ୍ପର୍କ ଥିଲା। ଉଭୟେ "ସମୁଦି" ଓ "ସମୁଦୁଣୀ" ବୋଲି ଡକାଡକି କରୁଥିଲେ। କିନ୍ତୁ ଘଟଣା ଦିନ ଭୋରେ ଲୁକୁ ଯେତେବେଳେ ଲକ୍ଷ୍ମୀଙ୍କ ଘରକୁ ଯାଇଥିଲେ, ସେଠାରେ ଜଣେ ଅଜଣା ପୁରୁଷଙ୍କୁ ଦେଖି ସନ୍ଦେହ ଓ କ୍ଷୁବ୍ଧତାରେ ଜଣ୍ଟୁ ହୋଇପଡ଼ିଥିଲେ। କ୍ଷୁଦ୍ର ମନଃସ୍ଥିତିରେ ଲୁକୁ ଘରୁ ଧନୁ ତୀର ଆଣି ସେହି ଅଜଣା ବ୍ୟକ୍ତି ଉପରେ ତୀର ଛାଡ଼ିଥିଲେ, ଯାହା ଦୁର୍ଭାଗ୍ୟବଶତଃ ଲକ୍ଷ୍ମୀଙ୍କ ପେଟକୁ ବାଜି ଲାଗିଗଲା। ଗୁରୁତର ଅବସ୍ଥାରେ ଲକ୍ଷ୍ମୀ କିଷାନକୁ ପ୍ରଥମେ ବଣାଇଁ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଥିଲା, ପରେ ଗୁରୁତ୍ୱ ବଢ଼ିବାରୁ ତାଙ୍କୁ ରାଉରକେଲା ଜନରାଲ୍ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ଘଟଣା ସ୍ଥଳରେ ଲହୁଣୀପଡ଼ା ଥାନା ପୋଲିସ ପହଞ୍ଚି ମାମଲାର ତଦନ୍ତ ଆରମ୍ଭ କରିଛି। ଅଭିଯୁକ୍ତ ଲୁକୁ କିଷାନକୁ ଅଟକରେ ରଖି ପଚରାଉଚରା ଚାଲିଛି। ଏହି ଘଟଣା ଗାଁ ଓ ଅଞ୍ଚଳରେ ଚର୍ଚ୍ଚା ଓ ଅସ୍ଥିରତା ସୃଷ୍ଟି କରିଛି।