ଏକତା ଛକରେ ଟ୍ରକ ଧକ୍କା, ସ୍ବାମୀଙ୍କ ଆଗରେ ସ୍ତ୍ରୀଙ୍କ ଦୁଃଖଦ ମୃତ୍ୟୁ

ନୂଆପଡା, ୨୦ / ୫  – ଜୀବନ ସାଥୀଙ୍କ ସାଥିରେ ଏକ ସାଧାରଣ ଯାତ୍ରା ଦୁଃଖଦ ଦୁର୍ଘଟଣାରେ ପରିଣତ ହେଲା, ଯେଉଁଠି ଏକ ଟ୍ରକ ଧକ୍କାରେ ଗୃହିଣୀ ରୁକ୍ମଣୀ ସାହୁଙ୍କ (୪୫) ଜୀବନ ଅନ୍ତ ହୋଇଗଲା। ସ୍ବାମୀ ଛବିଲାଲ ସାହୁ (୫୦) ଗୁରୁତର ଅବସ୍ଥାରେ ଚିକିତ୍ସାଧୀନ ଅଛନ୍ତି।
ମଙ୍ଗଳବାର ଦିନ ବାଇକରେ ରେଙ୍ଗାବାହାଲ ଗାଁରୁ ବୁଢ଼ୀପାଲି ପଞ୍ଚାୟତ ଅବସ୍ଥିତ ଜାମଲି ଗାଁରେ ଶ୍ୱଶୁର ଘରକୁ ଯାଉଥିବା ସମୟରେ ଏହି ଦୁଃଖଦ ଦୁର୍ଘଟଣା ଘଟିଥିଲା। ଏକତା ଛକ ନିକଟରେ ଏକ ଅଜଣା ଟ୍ରକ ବାଇକକୁ ପଛଦିଆରୁ ଧକ୍କା ଦେଇଥିଲା, ଯାହାରେ ଉଭୟ ଦମ୍ପତି ଛିଟିକି ପଡ଼ିଥିଲେ। ଘଟଣା ପରେ ସ୍ଥାନୀୟ ଲୋକମାନେ ଓ ପୋଲିସ ଦ୍ୱାରା ଦୁଇଜଣଙ୍କୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇ ଯିବା ପରେ ଡାକ୍ତର ରୁକ୍ମଣୀଙ୍କୁ ମୃତ ଘୋଷଣା କରିଥିଲେ। ସ୍ବାମୀ ଛବିଲାଲଙ୍କ ଅବସ୍ଥା ଗମ୍ଭୀର ହୋଇଥିବାରୁ ଚିକିତ୍ସା ଚାଲିଛି। ସଦର ଥାନା ପୋଲିସ ଦୁର୍ଘଟଣାସ୍ଥଳରେ ପହଞ୍ଚି ଟ୍ରକ ଓ ବାଇକକୁ ଜବତ କରିଛି। ଘଟଣା ସହିତ ଜଡିତ ଚାଳକଙ୍କୁ ଅଟକ ରଖାଯାଇଛି। ମୃତ ମହିଳାଙ୍କ ପରିବାର ଲୋକଙ୍କ ଆଗମନ ପରେ ପୋଷ୍ଟମର୍ଟେମ ଓ ହସ୍ତାନ୍ତର କାର୍ଯ୍ୟ ସମ୍ପନ୍ନ ହେବ ବୋଲି ପୋଲିସ ସୂଚନା ଦେଇଛି।