ମକା କିଆରୀରେ ଭାଲୁ ଆତଙ୍କ, ରାତାରାତି ଉଜାଡ଼ି ଦେଲା ଏକର ଏକର ମକା ଚାଷ

କୋକସରା, ୨୩/୦୯ ( ରିତେଶ କୁମାର ମୁଣ୍ଡ ) : କଳାହାଣ୍ଡି ଜିଲ୍ଲା କୋକସରା ବ୍ଲକ ଅନ୍ତର୍ଗତ ଆମପାଣି ଉପାନ୍ତ ଅଞ୍ଚଳରେ ଏବେ ଦିନକୁ ଦିନ ଭାଲୁ ଆତଙ୍କ ବୃଦ୍ଧି ପାଇବାରେ ଲାଗିଛି । ଫଳ ସ୍ୱରୂପ ଅଞ୍ଚଳରେ ଚାଷ କରାଯାଇଥିବା ମାଣ୍ଡିଆ, ହରଡ଼, କୋଳଥ, ମକା ଆଦି କିଆରୀରେ ଜଙ୍ଗଲି ଭାଲୁ ସବୁ ପଶି ବ୍ୟାପକ ପରିମାଣରେ ଫସଲ କ୍ଷୟ କ୍ଷତି କରୁଥିବା ଦେଖିବାକୁ ମିଳିଛି। ପ୍ରକାଶ ଯେ ଆମପାଣି ପଞ୍ଚାୟତ କନ୍ଦାଗଡ଼ ତିର୍ତିଆ ପଡ଼ାର ଚାଷୀ ଲକ୍ଷ୍ମଣ ରାଉତ ତାଙ୍କ କ୍ଷେତରେ ପ୍ରାୟ ଚାରି ହେକ୍ଟର ମକା ଚାଷ କରିଥିଲେ। ବର୍ତ୍ତମାନ ମକା ଅମଳ ସମୟରେ କିଛି ଜଙ୍ଗଲି ଭାଲୁ ତାଙ୍କ ମକା କିଆରୀରେ ପଶି ବ୍ୟାପକ ପରିମାଣରେ ମକା ଭଙ୍ଗାରୁଜା ଓ କ୍ଷୟ କ୍ଷତି କରିଥିବା ଅଭିଯୋଗ କରିଛନ୍ତି।ଲକ୍ଷ୍ମଣ ରାଉତ ଜଣେ ଗରିବ ଚାଷୀ । ଋଣ କରଜ କରି ସେ ଦି ପଇସା ଆଶାରେ ମକା ଚାଷ କରିଥିଲେ। ହେଲେ ବର୍ତ୍ତମାନ ଭାଲୁ ଆତଙ୍କ ଯୋଗୁଁ ତାଙ୍କର ପାଖାପାଖି ଏକ ଏକର ମକା ଚାଷ ସମ୍ପୂର୍ଣ୍ଣ ଭାବରେ ନଷ୍ଟ ହୋଇ ଯାଇଥିବା ପ୍ରକାଶ ପାଇଛି। ବନ ବିଭାଗ ପକ୍ଷରୁ ଆବଶ୍ୟକ ପଦକ୍ଷେପ ଗ୍ରହଣ କରି ଚାଷୀ ଲକ୍ଷ୍ମଣ ରାଉତଙ୍କୁ ସହାୟତା ପ୍ରଦାନ କରିବା ପାଇଁ ଦାବି କରିଛନ୍ତି। ପ୍ରକାଶ ଥାଉକି ଆମପାଣି ଅଞ୍ଚଳରେ ଏଥି ପୂର୍ବରୁ ମଧ୍ୟ ଅନେକ ଜଙ୍ଗଲି ଭାଲୁ ପଶି ବ୍ୟାପକ ଫସଲ କ୍ଷୟ କ୍ଷତି କରିବା ସହିତ ଲୋକଙ୍କ ଧନ ଜୀବନ ମଧ୍ୟ କ୍ଷତି କରିଛି। ତେବେ ଅଞ୍ଚଳରେ ବାରମ୍ବାର ଏପରି ଅଘଟଣ ଘଟୁଥିଲେ ମଧ୍ୟ ବନ ବିଭାଗ ପକ୍ଷରୁ କୌଣସି ପ୍ରକାର ଆବଶ୍ୟକ ପଦକ୍ଷେପ ଗ୍ରହଣ କରାଯାଉନଥିବା ଅଭିଯୋଗ ହୋଇଛି। ବନ ବିଭାଗ ଏଦିଗରେ ଯତ୍ନବାନ ହୋଇ ତୁରନ୍ତ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହେଉଛି ।