ବିବାଦର ଘେର ମଧ୍ୟରେ ୟୁଟ୍ୟୁବର ଲବ ହାଁସଦା, ପ୍ରେମିକା ଆତ୍ମହତ୍ୟା ମାମଲାରେ ଏତଲା

ଭୁବନେଶ୍ୱର, ୧୫ / ୫ : – ବ୍ୟକ୍ତିଗତ ଜୀବନର ଅନ୍ତଦ୍ୱନ୍ଦ ଓ ଅନୁଭୂତିର ଭାର ସାଧାରଣତଃ ପ୍ରଚାର ମାଧ୍ୟମରେ ପ୍ରକାଶ ପାଏ ନାହିଁ, କିନ୍ତୁ ବେଳେବେଳେ ଏହି ଅଦୃଶ୍ୟ ଅନ୍ତଃସଂଘାତ ବିଷ୍ଫୋରଣର ରୂପ ଧାରଣ କରେ। ଏପରି ଏକ ଅନ୍ତଃବିସ୍ଫୋରଣ ଦେଖା ଦେଇଛି ୟୁଟ୍ୟୁବର ଲବ ହାଁସଦାଙ୍କ ଜୀବନରେ। ବେଙ୍ଗାଲୁରୁ HSR ଲେଆଉଟ ଥାନାରେ ତାଙ୍କ ବିରୋଧରେ ଏତଲା ହୋଇଛି – ଅଭିଯୋଗ, ପ୍ରେମିକାଙ୍କୁ ନିର୍ଯାତନା ଦେଇ ଆତ୍ମହତ୍ୟାକୁ ବାଧ୍ୟ କରିଥିବାର। ଲବଙ୍କ ପ୍ରେମିକା ସୋଲମୀ ମୁର୍ମୁ – ଜଣେ  ବାଇକ ରାଇଡର, ଯିଏ ବିହାରରୁ ଥିଲେ, କିନ୍ତୁ ବେଙ୍ଗାଲୁରୁରେ ଚାକିରି କରୁଥିଲେ – ଦୁଇ ଦିନ ତଳେ ଆତ୍ମହତ୍ୟା କରିଥିଲେ। ସୋଲମୀଙ୍କ ଭାଇଙ୍କ ଅଭିଯୋଗ ଅନୁଯାୟୀ, ଲବ ହାଁସଦାଙ୍କ ବିଭିନ୍ନ ମହିଳାଙ୍କ ସହ ଥିବା ସମ୍ପର୍କ ନେଇ ସୋଲମୀ ପ୍ରଶ୍ନ କରିଥିଲେ। ଏନେଇ ଲବ ନିଜ ପ୍ରେମିକାଙ୍କୁ ମନୋବଳ ଭଙ୍ଗ କରିବା ପର୍ଯ୍ୟନ୍ତ ନିର୍ଯାତନା ଦେଇଥିଲେ ବୋଲି ଅଭିଯୋଗ। ସୋଲମୀଙ୍କ ଅତ୍ମହତ୍ୟା ପୂର୍ବରୁ ଲବ ସହ ହୋଇଥିବା ଶେଷ କଥାବାର୍ତ୍ତା ମଧ୍ୟ ଏତଲା ରେ ଉଲ୍ଲେଖ ହୋଇଛି, ଯାହା ମାମଲାକୁ ଆହୁରି ଗଭୀର ଓ ସଂବେଦନଶୀଳ କରିଦେଇଛି।
ଗ୍ରାମ ଠାରୁ ଗ୍ଲୋବ ଯାତ୍ରା କରି, ଯୁବ ମନରେ ନିଜ ସ୍ଥାନ ସୃଷ୍ଟି କରିଥିବା ଲବ ହାଁସଦା ପ୍ରଥମେ ୟୁଟ୍ୟୁବ ଭିଡିଓ ଓ ପରେ ସଙ୍ଗୀତ ଜଗତରେ ପ୍ରବେଶ କରିଥିଲେ। କିନ୍ତୁ ବର୍ତ୍ତମାନ ସେ ଜନମତ ଓ ଆଇନ ଦୁହେଁର ପରୀକ୍ଷାରେ ପଡ଼ିଛନ୍ତି। ପୋଲିସ ତଦନ୍ତ ଜାରି ଅଛି। ଏହି ମାମଲାରେ ଅଗ୍ରଗତି କଣ ହେବ, ଲବଙ୍କ ବ୍ୟକ୍ତିଗତ ଓ ବୃତ୍ତିଜୀବନ ଉପରେ କିପରି ପ୍ରଭାବ ପଡ଼ିବ – ଏହା ଆସନ୍ତା ଦିନର ଘଟଣାବଳୀ ଉପରେ ନଜର ରଖିବାକୁ ପଡ଼ିବ।