ବରଗଡ଼ରେ ଛତିଶଗଡ଼ ର ଧାନ, ଧାନ ସଂଗ୍ରହ ଋତୁ ଆରମ୍ଭରୁ ଅବୈଧ ପ୍ରବେଶ ଉପରେ ପ୍ରଶାସନର କଡ଼ା ନଜର

ବରଗଡ଼, ୧୬ / ୫ : – ବରଗଡ଼ ଜିଲ୍ଲାରେ ଚଳିତ ରବି ଧାନ ସଂଗ୍ରହ ପ୍ରକ୍ରିୟା ବୁଧବାରଠାରୁ ସାର୍ବଜନୀନ ଭାବେ ଆରମ୍ଭ ହୋଇଥିବା ବେଳେ, ଛତିଶଗଡ଼ରୁ ଧାନ ବୋଝେଇ ଆସୁଥିବା ଏକ ଟ୍ରକ୍‌ ଧରାପଡିବା ଘଟଣା ଅଞ୍ଚଳରେ ଚର୍ଚ୍ଚା ଓ ଚିନ୍ତାର ବିଷୟ ହୋଇପଡ଼ିଛି।
ଗୁରୁବାର, ଝାରସୁଗୁଡ଼ା ସୀମାଘାଟି ଉଳ୍ଲଂଘନ କରି ବରଗଡ଼ ସହର ଉପକଣ୍ଠ ହଳଦୀପାଲି ଛକ ପର୍ଯ୍ୟନ୍ତ ପହଞ୍ଚିଥିବା ଏକ ଟ୍ରକ୍‌ (ନଂ. CG12C/4018) ରେ ପ୍ରାୟ ୫୦୦ ବସ୍ତା ଧାନ ରହିଥିବା ଜଣାପଡ଼ିଛି। ଉପଜିଲାପାଳ ପ୍ରସନ୍ନ କୁମାର ପାଣ୍ଡେଙ୍କ ନେତୃତ୍ୱରେ ପ୍ରଶାସନ ଟ୍ରକ୍‌ଟିକୁ ଅଟକ କରି ଯାଞ୍ଚ କରିଥିଲେ। ଟ୍ରକ୍‌ ଚାଳକ ଅନୁସାରେ ଧାନ କେଉଁଠାରୁ ଆସିଥିଲା ବା କେଉଁଠାକୁ ଯିବା ଥିଲା – ସେଥିପାଇଁ ସ୍ପଷ୍ଟ ଉତ୍ତର ମିଳିନଥିଲା। ଏହି ଅବସ୍ଥାରେ ଟ୍ରକ୍‌କୁ ଜବତ କରି ଧାନ ସ୍ଥାନୀୟ ଏକ ରାଇସ୍‌ ମିଲ୍‌ର ଜିମାରେ ଦିଆଯାଇଛି।
ଉଲ୍ଲେଖନୀୟ, ଛତିଶଗଡ଼ରେ ରବି ଧାନ ଚାଷ ସାଧାରଣତଃ ହୁଏନାହିଁ। ଏହା ଦେଖି ପ୍ରଶାସନ ଏହି ଧାନ ଉତ୍ପତ୍ତି ଓ ପ୍ରବେଶ ଉପରେ ଅନୁମାନ ଜଣାଇଛି। ଧାନ ସଂଗ୍ରହକୁ ନେଇ ଜିଲାସ୍ତରୀୟ ବୈଠକରେ ଜିଲାପାଳ ଆଦିତ୍ୟ ଗୋୟଲ ପୂର୍ବରୁ ବିଭାଗୀୟ ଅଧିକାରୀମାନେ କୁ ସଚେତନ ଓ ସତର୍କ ରହିବା ନିର୍ଦ୍ଦେଶ ଦେଇଥିଲେ।
ଏହି ଦିଗରୁ ଦେଖିଲେ, ଧାନ ସଂଗ୍ରହ ଋତୁ ଆରମ୍ଭ ସହିତ ବରଗଡ଼ର ଧାନ ବଜାରରେ ଛତିଶଗଡ଼ ଧାନ ଅବୈଧ ଭାବେ ପ୍ରବେଶ କରିବା ଏକ ଚିନ୍ତାଜନକ ପରିସ୍ଥିତି ସୃଷ୍ଟି କରିପାରେ। ଏହା ନ କେବଳ ସ୍ଥାନୀୟ ଚାଷୀଙ୍କ ଅଧିକାର ଉପରେ ପ୍ରଭାବ ପକାଇପାରେ, ବରଂ ସରକାରୀ ଧାନ ନୀତି ଓ ଗୋଦାମ ରେକର୍ଡ ଉପରେ ମଧ୍ୟ ପ୍ରଶ୍ନ ଉଠିପାରେ।
ପ୍ରଶାସନ ଦ୍ୱାରା ଏହି ପ୍ରସଙ୍ଗରେ ଅନୁଷ୍ଠିତ ପ୍ରାରମ୍ଭିକ କାର୍ଯ୍ୟ ଗ୍ରହଣ କରାଯାଇଥିବା ବେଳେ, ଆଗାମୀ ଦିନରେ ଏହାପରି ଅବୈଧ ଧାନ ଆଗମନ ଉପରେ କଡ଼ା ତଦନ୍ତ ଓ ନଜର ରଖିବାକୁ ଦାବି ବଢ଼ିଯାଇଛି।